کراچی (اسٹاف رپورٹر):ہمدرد پبلک اور ولیج اسکولز کی جانب سے حسبِ روایت شہیدِ پاکستان، حکیم محمد سعیدؒ کے106ویں یومِ ولادت کو فاؤنڈرز ڈے کے طور پر 12 جنوری 2026 کو بلاول اسٹیڈیم میں انتہائی جوش و خروش اور عقیدت کے ساتھ منایا گیا۔ اس موقع پر سالانہ فوڈ فئیر 2026 کا انعقاد بھی کیا گیا، جس میں طلبہ و طالبات اور اساتذہ نے مل کر مختلف فوڈ اسٹالز لگائے اور اپنی تخلیقی صلاحیتوں کا شاندار مظاہرہ کیا۔
تقریب کی مہمانِ خصوصی محترمہ قُدسیہ اکبر، سی ای او لمبلس فاؤنڈیشن پاکستان تھیں۔ جبکہ تقریب میں محترمہ سعدیہ راشد (ہلالِ امتیاز)، صدر ہمدرد فاؤنڈیشن پاکستان، محترمہ فاطمہ الزہراء (وائس پریذیڈنٹ مدینۃ الحکمہ)، فیصل ندیم (چیف فنانشل آفیسر)، پروفیسر ڈاکٹر عمران امین (وائس چانسلر ہمدرد یونیورسٹی)، ایڈمنسٹریٹر خالد نسیم اور دیگر معزز شخصیات نے شرکت کی۔
مہمانِ خصوصی محترمہ قُدسیہ اکبر نے اپنے خطاب میں ہمدرد انتظامیہ کی دعوت اور شاندار انتظامات پر شکریہ ادا کیا اور شہیدِ پاکستان حکیم محمد سعیدؒ کی علمی، تعلیمی اور سماجی خدمات کو خراجِ تحسین پیش کیا۔ انہوں نے کہا کہ حکیم سعیدؒ نے تعلیم کو قوم کی تعمیر کی بنیاد قرار دیا اور بچوں کی تربیت و کردار سازی پر خصوصی توجہ دی۔ انہوں نے محترمہ سعدیہ راشد کی خدمات کو بھی سراہتے ہوئے کہا کہ وہ حکیم محمد سعیدؒ کے مشن کو بھرپور انداز میں آگے بڑھا رہی ہیں۔
صدر ہمدرد فاؤنڈیشن پاکستان محترمہ سعدیہ راشد نے اس موقع پر اظہارِ خیال کرتے ہوئے کہا کہ حکیم محمد سعیدؒ کو بچوں سے بے حد محبت تھی اور ان کا خواب تھا کہ پاکستان کا ہر بچہ علم کی روشنی سے منور ہو، حب الوطنی کے جذبے سے سرشار ہو اور ملک کو ترقی و خوشحالی کی راہ پر گامزن کرے۔ ہمدرد اسی وژن کے تحت نسلِ نو کی تعلیم و تربیت میں مصروفِ عمل ہے۔
تقریب کے دوران معزز مہمانوں نے فوڈ فئیر کے مختلف اسٹالز کا دورہ کیا، طلبہ کی کاوشوں کو سراہا اور ان کی حوصلہ افزائی کی۔ تقریب کے اختتام پر طلبہ کی محنت، اساتذہ کی رہنمائی اور انتظامیہ کی کاوشوں کو زبردست خراجِ تحسین پیش کیا گیا، جبکہ شرکاء نے فوڈ فئیر سے بھرپور لطف اٹھایا۔
